Georgina Laboda

k-o anav e ternipnasqe iniciativaqo „Dikh He Na Bister” vaś o seravipe

Seravutno àkti k-o Evroputno Dives e Seripnasqo vaś o Genocìdi e Sintenqo aj Rromenqo p-o 2to Avgust 2023 k-o purano nazìsto kàmpi e koncentraciaqo aj eksterminaciaqo Auschwitz-Birkenau

Patǐvale dosta,
Kuć Gerda Pohl, kuć praʒivde e genocidesqe,

Sarkon berś avas akate śela terne kotar sa o sundal te seras khetanes tumença savorrença kodolen so mule and-o Auschwitz. Akate tordǒvas te seras o genocìdo e 500 000 sintenqo aj rromenqo so mudardile and-i Evròpa.

Amenqe sar terne so avas kathe, o po speciàlo ćìro sòfora sas kana maladǒvas e praʒivdença. Savorre seras odola sumnakune momènte so beślam amare amalença, e praʒivdença Zoni Weisz, Krystyna Gil, Peter Höllenreiner, Bandi Bacsi, Ivan Bilaszczenko, Rita Prigmore, Nadir Dedic aj Raymond Gurême.

Kotar amaro ilo naisaras tumen vaś tumari trom kaj mothoven amenqe tumari història. Tumen putarden amare jakha vaś odova so ondilo and-o nakhlipe. Tumen akharden vaś rezistència, mutuàlo respèkto aj o kamipe ka aćhol sòfora jekh esenciàlo part amare miśkipnasqo. Tumen zorǎrden amari trom te uśtas mamuj o anticiganìzmo, o anitsemitìzmo aj sa o fòrme e racizmesqe save amen, terne rroma ta sìnte, pànda cidas avdives.

Kuć praʒivde, tumari trom del amen patǎpe no vi jekh bari responsabilitèta. Avdives tordǒvav akate k-o anav mije ternenqo kotar sa i Evròpa. Das amari vòrba, amaro lav, kaj ka dikǎras dureder i mìsia so tumen śirdien.

Amen akharas akaja iniciatìva “Dikh He na Bister”. Sar terne rroma, sìnte, ʒuta aj aver terne kotar sa i Evròpa amen sam angaźome te vazdas o ʒanipe p-o genocìdo e sintenqo aj rromenqo. Amen patǎs kaj o siklǎripe pal-o genocìdo si kruciàlo vaś o maripe mamuj o anticiganìzmo avdives. Amen pànda maras amen vaś o prinʒanipe e bangimatenqo so kerdile anglal and-o nakhlipe ta vi akana.

Amaro amal o Raymond Gurême sas jekh kotar o manuśa save dias amen maj but inspiràcia aj zor, buten maśkar amenθe. O Raymond sas phandlo ande but koncentraciaqe kàmpe no aresla te naśel, aj te ʒal and-i francikani rezistència mamuj o nazìstǎ. Kana dikhla sar barǒl o racìzmo p-i sa i Evròpa k-i palutni dekàda, ov naśtisarda te maj aćhol bi vakerdo. O Raymond phendas amenqe aj dias amen jekh mìsia: „Nikana p-e ćanga, sòfora torde. Rezistència!

Kamav te dav patǐv avdives lesqi trom aj vi o biaćhavdo angaźamènto sa e praʒivdenqo; mekh sikaven amenqe o drom zorale and-o avindipe.

Nikana nanaj te bistras - Dikh He Na Bister!