Nicola Beer

Seravutno àkti k-o Evroputno Dives e Seripnasqo vaś o Genocìdi e Sintenqo aj Rromenqo p-o 2to Avgust 2023 k-o purano nazìsto kàmpi e koncentraciaqo aj eksterminaciaqo Auschwitz-Birkenau

Draga praʒivde e Rromenqe aj Sintenqe Holokaustesqe,
Drago rani Pohl,
Draga raja Rose, raja Kwiatkowski aj raja Cywinski,
Dragone Ranǎ!len aj Raja!len,

Si bari patǐv aj bari responsabilitèta manqe te vakerav sar vice-prezidènta e Evroputne Parlamentesqi anglal tumenθe avdives and-o Evroputno Dives e Holokaustesqe Seravipnasqo vaś o Sìnte aj Rroma.

And-o 2015, o Evroputno Parlamènti deklaronda o 2to Avgust sar Evroputno Dives e Holokaustesqe Seravipnasqo vaś o Sìnte aj Rroma. Kodova dives, and-o 1944, o palutne 4300 Sìnte ta Rroma mudardile brutal and-o livnǎ e gazesqe and-o Auschwitz-Birkenau. Von sas len savorren pumare històrie te mothoven, pumare sune te realisaren aj pumaro tràio te train.

I dukh xaćardi kotar lenqo xasaripe si but ʒivdikanes sikavdi and-I poèma e Santinosqi Spinelli, Auschwitz:

‘Muj śuk
jakha kale
vušt šurde
kwit
ilo ćhindo
bi lav
nikt
nanaj ni roipen’.

Akaja poèma si lekhli and-i metalìko rami e paněsqe ćaresqo and-o Nacionàlo Memoriàli e Sintenqo aj Rromenqo e Evropaqe mudarde tal o nacional-socialìzmo, savo putardilo and-o 2012 and-o Berlin.

Paśpaśe dopaś miliòni Sìnte ak Rroma mudardile barbarikanes – teroresqe àkte sar naśti ʒal i godi, meripe aj xarravipe so anèlas o nazìsto regìmi. But lenθar mule and-o kàmpi e meripnasqo akate and-o Auschwitz-Birkenau. O traśvale krìme so kerde o germànǎ pheren man personal laʒ, xoli aj dukh.

Trebul te seras o Holokaust avdives. Musaj.
O ʒungalimàta e dujtone sundalesqe maripnasqo sikavde amen jekh lèkcia: Nijekh var maj!

Amen trebul te seras vi avdives aj vi k-o avutnipe kaj akala àkte mamuj o manuśipe ni trebul te oven kerde palpalem nijekh var and-i Evròpa, ni ande nijekh aver than e sundalesqo. Si amari dutǐ aj responsabilitèta te seras. Musaj te ovel amari kolektìvo responsabilitèta te sikavas o avutne generàcie pal o holocaust e Sintenqo aj Rromenqo.

Te siklǎras pala lenqi història sar vi pala lenqi akanutni situàcia. O seravipe musaj te ovel les andre vi o maripe sar societèta mamuj sarsavi fòrma diskriminaciaqi aj racizmesqi.

Madikh sa o berśa e butǎqe, na aćhavdam I diskriminàcia and-i avdusni Evròpa:
o anticiganìzmo aćhol jekh buxlǎrdi fòrma e racizmesqi ande amare dostimàta. O sondàźe sikavde kaj buteder sar 40% e Sintenqo aj Rromenqo nakhle k-i diskriminàcia and-o panʒ palutne berś.

Akala dukhavne ćìfre ʒan mamuj amare esenciàlo Evroputne molǎ aj amaro halǒvipe e barabaripnasqo vaś sa o manuśa. Akava si vareso kaj naśti priaras. Musaj te ovel duślo sarkonesqe: o Sìnte ta o Rroma si evroputne themutne vipale hakajença, mestimatença aj perspektivença.

O evroputno parlamènti si te del pes zor akelesqe: te maras amen mamuj o racìzmo aj o negatìvo stereotìpe, kana and-o vipal vaxt buxlǎras o ʒanipe pal-o unìko història aj kultùra e Sintenqi aj Rromenqi. Baxtǎrav i EU-aqi strategìko rami vaś barabaripe, inklùzia ta participàcia, savi del duśle areslimàta vaś o thema somdasne te maren pen mamuj o anticiganìzmo ta i diskriminàcia ande sa o umala e ʒivipnasqe.

Sartovel, i komemoràcia avdives musaj te ovel vi sar jekh seravipe sa e generacienqe. O totalitarìzmo, o nasvalo nacionalìzmo aj o ekstremìzmo na trebul te ovel len than ande amaro dostipe. Khetanes, trebul te das amen zor vaś jekh ʒivipe k-o respèkti jekh avresqe, halǒvipnaça jekh avreça.

Vipal vaxte, si amen jekh moràlo, societàlo aj politikani obligàcia te dikǎras i memòria e holokaustesqe viktimenqi, sar vi e praʒivdenqi.

Tu, rajnie Pohl, aj aver praʒivde, si tumen baro ilo kaj aven aj mothoven amenqe historie tumare ʒivipnasqe. Madikh so butivar si dukhavne kana śunas len, si len o potenciàli te barǎren i empatìa, te den amen inspiràcia aj te ispiden amen te maras amen mamuj i diskriminàcia, o racìzmo aj sa o krìme mamuj o manuśipe.

Akalaqe som lośali buteder kana dikhav odoborkha ternen kotar sa i Evròpa akate amença avdives save kidinǒn sarkon berś and-o evroputno ondipe e ternipnasqo “Dikh he na bister”. Si vasno te angaźonas aj te das ilo manuśen, politikanen, ternen aj jekh ʒivdo aj zoralo civìlo dostipe te brakhas amare molǎ aj te uśtas vaś jekh dostipe bi diskriminaciaqo, bi xiraqo aj bi violenciaqo.

Amaro angaźamènto karing o viktìme e holokaustesqe si kaj lenqi memòria naj te xasardǒl, no ka ʒal anglal e generaciença.

Kamav te naisarav sarkones kon si akate avdives aj si angaźuime te dikǎrel akaja memòria.

Manqe si but vasno.
Nais tumenqe