Roman Kwiatkowski

Seravutno àkti k-o Evroputno Dives e Seripnasqo vaś o Genocìdi e Sintenqo aj Rromenqo p-o 2to Avgust 2023 k-o purano nazìsto kàmpi e koncentraciaqo aj eksterminaciaqo Auschwitz-Birkenau

Ranǎ!len aj Raja!len,

Avdives si o Evroputno Dives e Holokaustesqe Seravipnasqo vaś o Rroma ta o Sìnte.

Efta var deś ta enia berś anglal, o palutne Rroma aj Rromnǎ phandline k-o Kampo e Meripnasqo - 4,300 ʒene – sas line k-o livnǎ e gazesqe. Kadial, I kriminàlo ideològia e nazismesqi mangla te khosel kotar i màpa e Evropaqi jekh nàcia savi ekzistuinda ande laqi història paśpaśe 700 berś.

No o Rroma ta o Sìnte praʒivde o Holokaust, sar praʒivde sarkon periòda persekuciaqi aj ekskluziaqi, aj kadalaθar si amenqe odoborkha vasni i prezènca maśkar amenθe e praʒivdenqi save si sòfora maj cèrra ʒene – gevaja e genocidesqe.

Sam lośale kaj sòfora maj but terne kidinǒn amençar akate sarkon berś. Si but vasno odolesqe so o terne garantuin kaj ka aćhol ʒivdo o seripe e dopaś milione Rromenqi aj Sintenqi mudarde k-o dùjto sundalesqo maripe. Akalaθar maj but sar triànda berś, pal-i iniciatìva e Rromenqe Asociaciaqi and-i Pòlska, khetanes e Centralone Sombeśeça e Germanikane Sintenqo aj Rromenqo, amen maladǒvas k-o akava monumènto.

O gèndo e dostenqo savo barǒl sikavel amenqe but – sikavel kaj i eksterminàcia e Rromenqi aj e Sintenqi maj naj sadaj jekh margilàno aj bipinʒardo epizòdo e dujtone sundalutne maripnasqo no si lekhavdo permanent and-i tragìko història kodole vaxtenqi. O 2to Avgust si jekh dives ćhivdo vaś o avindipe and-o kalendàrǎ bute Themenqe sar oficiàlo dives e seravipnasqo vaś amare phrala aj phenǎ mudarde.

Dùjto var, aj patǎl mo ilo te ovel i palutni, maladǒvas k-o monumènto and-o Birkenau and-i ućhalin e maripnasqi kaj kerel pes nadur akatar. I determinàcia e Ukrainaqe brakhnenqi, maśkar save vi Rroma e thanesqe, na ovèlas dòsta te rezistonel i zor e śastrinenqi so si len o astarne, bi e solidaritetaqo kotar o nàcie aj o raimàta e meste sundalesqe. I akanutni situàcia sikavel zorales kabor si vitàlo te keras buti khetanes, te ćhudas o nacionàlo egoìsme, aj te mukhas o partikulàro interèsǎ kana i Evròpa na kamel te irinel palpalem i lèkcia so sas la akana 80 berś palal.

No o duśmànǎ e mestipnasqe na aven sòfora amenθe avrial. O racistikane aj nacionalìsto ideologìe si pànda ʒivde and-i Evroòpa e 21-tone śeliberśesqi. Amenqe, Rroma thaj Sìnte, aborkha dukhavde kotar i història, sarkon manifestàcia e ekskluziaqi aj e diskriminaciaqi si jekh akharipe te ʒangadǒvas te nìmaj avel palpalem o tragìko vaxt so sas akana 80 berś. I demokracìa aj o mestipe musaj te oven brakhle mamuj o andrutne duśmànǎ vipal determinaciaça sar brakhas len kotar o avrutne astarne.

Ranǎlen aj rajalen, o kokalo e rromane identitetaqo si i memòria, i ćhib ta i kultùra. Lença barvalǎras amen i kultùra e maźoritàro dostimatenqi kaj ʒivas. A vi amen las kotar i kultùra e lumǎqi trujal amenθe. Naj kontradìkcia te oves Rrom, Sìnti aj themutno jekhe Themesqo kodolenθar kaj beśas generaciença.

Sartovel, musaj te ovel jekh baro paruvipe and-o relàcie maśkar o Thema aj o rromane khetanimàta.
Sa o progràme aźutipnasqe aj asistenciaqe vaś amari minoritèta – vi odola kaj implementuin direkt o direktìve e Evroputne Uniaqe – musaj te oven implementuime participaciaça e Rromença aj e Sintença aj na bi te ʒanen on khanć.

Amen sam odola save ʒanas amare problème aj amare nevòje maj miśto; amen – amare sarkondivesutne eksperenciaça – śaj te ćaćǎras o mandaj aj i efikasitèta akale programenqi. ss the sense and effectiveness of these programs. Si prabut sure kaj publìko love si pokinde ande jekh ćhand kaj na laćharel amari komunitèta aj varekàna vi thovel amen k-o duśmanipe e maźoritetaça. Varesave projèkte naj komplèto, aver keren palpalem i politìka e sThemesqi karing sa o dostipe, aver naj sosqe te ekzistuin. Sare si len jekh khetani karakteristìka – o Rroma ta o Sìnte na len kotor ande lenqi kreàcia, on naj pućhle so gndin, aj si mukhle and-i ròla e pasivone konsumatorenqi e aźutipnasqo.

Kamav te dav ćalno pe akava zorales – sadaj o aźutipe kotar i rromani komunitèta ka anel o rezultàte so mangas, ande save o Rroma ta o Sìnte ka ovel len jekh decizìvo influènca p-i planifikàcia ta p-i implementàcia. I responsabilitèta ta i participàcia and-o vazdipe amare baxtaqi si o maj vasne faktòrǎ e civikone aj socialone Rromenqe integraciaqi. Te na bistras kaj amari ćhib, amari kultùra aj amare tradìcie musaj te oven dikhle sar o temèle e identitetaqe, save musaj te oven dine sàma aj brakhle and-o dostimàta kaj prinʒanen o ververipe sar jekh unìko mol.

Amen, Rroma ta Sìnte, si amen amare verver identitètǎ. No akava na aćhavel amen te ovas themutne e Themesqe kaj si amaro. Si amen hakaja aj obligàcie sar sa amare somthemutne; amen na mangas privilège ja speciàlo tretmàno ande nijekh umal bi relaciaqo amare tradiciença, kulturaça aj ćhibǎça. Pe aver rig, e Themesqe politìke pal-o sociàlo, o sastipe aj i edukàcia azban amen sajekh sar o dostipe.

Ande akaja umal, jekh baro ondipe si o vazdipe e Centresqo vaś i rromani kultùra aj història ande akaja zòna. Kasavi institùcia – vazdini amença aj ande savi si te ovel amen amari vòrba te phenas pala laqe resa aj o metòde e butǎqe – si jekh elemènti ćaće aźutipnasqo vaś i rromani komunitèta. Akava si jekh semnàlo duślo kaj i rromani kultùra naj jekh rrangvalo folklòro no jekh kotor e kulturaqo aj e historiaqo saste naciaqo. Naj lokhes te arakhes maj lahi integràcia – na kerindoj uniform o dostipe, no vazdindoj p-o lesqo multikulturàlo barvalipe.

Kadial, i Pòlska ondili jekh unìko Them ande amaro kotor e Evropaqo. Phares arakhes jekh misal maj laćhi e politikaqi karing o minoritète savi thovel sàma p-o so si maj vasno sarkone etnikane grupaqe – dikǎrindoj laqi identitèta aj kerindoj la jekh indispensàblo kotor e nacionalone kulturaqo. Adalesqe, avdives kamav te naisarav sarkones kon dia vast akala butǎθe, special o sombeś e voivodiaqo aj o undǎrne kotar o Małopolskie sejmik. Tumen sikavden kaj amari koekzistènca pe jekh phuv si integràlo and-e Polskaqi thaj and-i rromani kultùra aj identitèta.

Ranǎlen aj rajalen, Pala jekh berś pherdǒn 80 berś kotar o holokàusto e Zigeunerlager-esqi and-o Auschwitz-Birkenau. Mo ilo mangel te dikhas amen atùnci bi bute darěnqo save si amen avdives aj kaj i memòria e Holokaustesqi ka ovel, angla sa, jekh lèkcia and-i història aj and-i memòria aj na jekh dikhat mamuj jekh nevo rizìko fanatismesqo aj racizmesqo. O avutne generàcie naśti te ovel len i baxt lenqe phurenqi, aj akalaqe, amen avorre sam godorne vaś lenθe.